Алматы қаласының басшылығы Алмалы ауданының жол-көлік инфрақұрылымын одан әрі дамыту мәселесіне ерекше көңіл бөліп келеді. Бұл туралы бүгін Е.Досаевтың аудан тұрғындарымен кездесуінде белгілі болды, деп хабарлайды Almaty-akshamy.kz.
- Осы жылдың маусым айының басынан бастап аудандық маңызы бар 11 көшеге және жалпы ұзындығы 25 шақырым болатын 5 магистралды көшеге орташа жөндеу жұмыстарын бастаймыз. Бұл мақсаттарға жергілікті бюджеттен 4,3 млрд. теңге бөлінді. Децентрализация аясында биыл аудан әкімдіктері жолдарға ағымдағы жөндеу жұмыстарын жүргізе бастайды. Бұл үшін Алмалы ауданына 500 млн теңге бөлінді, шара 46 мың м2 жол төсемін жөндеуге мүмкіндік береді, - деді Алматы қаласының әкімі Е.Досаев
Осы жылдың маусым айында әкімдік Байтұрсынов пен Досмұхамедов көшелерінің арасындағы Әйтеке би көшесінің бойына тротуар орната отырып, жолды ұзартуды бастауды жоспарлап отыр.