6 қазан күні Астана қаласында республикалық «Зерделі» оқу орталығы өзінің 10 жылдық мерейтойын атап өтті. Салтанатты шара барысында орталықтың негізін қалаған ағайынды Ырысбек және Өжет Мәуіт үздік ұстаздарға пәтер сертификаты мен Дубайға демалыс жолдамасын сыйға тартты, деп хабарлайды aqshamnews.kz
«Зерделінің 10 жылдық мерейтойы ұстаздар күнімен тұспа-тұс келді. Осыған орай, 7 мұғалімге баспана алуға қолдау көрсетуді шештік. Бұған дейін де 25 ұстазымыздың үйлі болуына көмектескен едік. Бұл үрдіс әлі де жалғасын табады. Ұстаздық қызметке өмірін арнаған жандар үшін қандай қолдау жасасақ та лайықты. Сонымен қатар, 15 адамға Дубайға демалыс жолдамасын сыйладым. Өткен оқу жылында да Зерделіде қызмет еткен 100-ге жуық ұстазымыз осы жолдамамен Дубайда демалып қайтқан», – деді Ырысбек Мәуіт.
Қазіргі таңда Зерделі орталығы еліміздің 18 облысында 41 оқу орталығымен, 7 мектебімен және 50-ге жуық бөлімшесімен жұмыс істейді. Астананың өзінде 500-ге жуық педагог қызмет атқарады.
«Мерекеде ұстаздарға сапалы әрі адал еңбектері үшін ақшалай сыйақы мен соңғы үлгідегі айфондар табыстадық. Президентіміз «Педагог мәртебесін көтеру – мемлекеттік саясаттың маңызды бөлігі» деп атап өткендей, біз ұстаздарға құрмет пен материалдық қолдаудың қатар жүруін маңызды деп санаймыз», – деп қосты кәсіпкер-педагог.
Мерекелік кешке еліміздің мәдениет және өнер қайраткерлері келіп, ән мен жырдан шашу шашты. Қонақтардың қатарында дәстүрлі әнші Ерлан Рысқали мен ақын Қалқаман Сарин болды.
Керек дерек
«Зерделі» оқу орталығы – дарынды балаларға арналған білім беру орталығы. Соңғы 10 жыл ішінде орталық еліміздің ең ірі білім беру орындарының біріне айналды.