Ауруды жұқтырудың негізгі орындары айтылды.
Көзге көрінер қауіптің болмауына байланысты халықтың жеке қауіпсіздік шараларын төмендетуі, қоғамдық орындарда және көлікте маска режимін сақтамауы тұрғындардағы инфекцияның өсу себептерінің бірі, деп хабарлайды Almaty-akshamy.kz.
Бұл мәліметті Алматы қаласының санитариялық-эпидемиологиялық бақылау Департаментінің басшысы, қаланың бас мемлекеттік санитар дәрігері Жандарбек Бекшин Алматы қаласында өткен онлайн брифингте айтып өтті.
«Бүгінгі күні эпидемиологиялық тексеру нәтижелері бойынша сауда объектілері – 32 %, отбасылардағы байланыстар – 16%, қоғамдық көлік – 17,1%, базарлар – 13% ауырғандарды жұқтырудың негізгі орындары болып табылады», - дейді бас санитар.
Сонымен қатар ол тұрғындардың инфекциялануының өсу себептерін атады. Олардың қатарында көзге көрінер қауіптің болмауына байланысты халықтың жеке қауіпсіздік шараларын төмендетуі, тұрғындардың қоғамдық орындарда және көлікте маска режимін сақтамауы.
COVID-19 вирусы дельта нұсқасының жоғары жұқпалылығы мен патогендігін айтқан Ж. Бекшин отбасына инфекция түскен кезде отбасының барлық мүшелері жұқтыратынын, 95% клиникалық көріністермен ауыратынын жеткізді.
Сондай-ақ, 1-эшелондағы инфекциялық төсектердің 95%-ы, стационарларда ауыр және аса ауыр жағдайларда науқастардың 45%-ы жұмыспен қамтылғандар екенін де айтты.
Қоғамдық тамақтандыру кәсіпорындарында, қала маңы аймағында және жалға алынған коттедждерде жаппай отбасылық іс-шараларды, той, мерейтойларды тыйым салынғанына қарамастан, халықтың ұйымдастыруы инфекцияланудың өсуіне себеп болып отыр. Азаматтардың бір бөлігінің вакцинациялаудың пайдасы туралы күмәндәрінің жалғасуы да инфекцияланудың өсуіне себеп.
«Эпидемиологиялық талдау нәтижесі бойынша бүгінгі күні жұқтырғандардың 34%-ы - 20-дан 40 жасқа дейінгі жастар», - деп атап өтті Ж. Бекшин.
Қоғамдық орындарға: дәмханаларға, мейрамханаларға, түнгі клубтарға белсенді түрде барып, вакцина егуді және бетперде режимін сақтауды қаламайтындар кінәсінен инфекцияны көп отбасы мүшелері жұқтыратындығы, ал бұл қаладағы барлық КВИ жағдайларының 70% - дан астамын құрайтыны айтылды.
«Эпидемиологиялық жағдайды тұрақтандыру және білім беру мекемелерінде жаңа оқу жылын штаттық режимде ұйымдастыру мақсатында халықты жедел вакцинациялауға және қоғамдық орындар мен қоғамдық көліктерде бетперде режимін сақтауға, адамдар көп жиналатын объектілерге, түнгі клубтарға, мейрамханаларға, кафелерге бармауға, үй жағдайында бұқаралық іс-шараларды шектеуге шақырамын», - деді Жандарбек Бекшин.