Энергетика министрлігі: Жылу беру маусымына 5,2 млн тонна көмір және 88 мың тонна мазут дайындалды
Премьер-Министр Олжас Бектеновтің төрағалығымен өткен Үкімет отырысында энергетикалық және коммуналдық инфрақұрылымның алдағы жылу беру маусымына дайындығы туралы энергетика министрі Алмасадам Сәтқалиев баяндама жасады.
Жылу беру маусымы Абай, Ақмола, Атырау, Шығыс Қазақстан, Қарағанды, Қостанай, Павлодар, Солтүстік Қазақстан облыстарында және Астана қаласында басталып кетті. Ауа райының жағдайына байланысты батыс және оңтүстік өңірлерде қазан айының ортасынан бастап жылу беріледі деп жоспарлануда.
Энергетика министрінің айтуынша, электр стансаларында жөндеу кестесіне сәйкес 5 энергия блогында, 32 қазандықта, 28 турбинада жөндеу жұмыстары аяқталды. Қазіргі таңда 4 энергия блогында, 23 қазандықта және 16 турбинада жөндеу жұмыстары әр түрлі кезеңдерде жүргізілуде.
Электр желілері бойынша 19,9 мың км электр беру желілері, 376 қосалқы станса және 4 046 тарату пункті мен трансформаторлық қосалқы стансалар жөндеуден өтті.
Министрлік алдағы жылу беру маусымында тұтынушыларды энергиямен жабдықтаудың сенімділігін арттыру үшін:
- электр энергиясының шекті тарифтері қайта қаралды;
- қайтарымды инвестициялардың жылдық лимиті ұлғайтылды.
2024 жылы қабылданған шаралар жөндеу жұмыстарын қаржыландыруды өткен жылмен салыстырғанда 44%-ға арттырып, 327 млрд теңгеге жеткізуге мүмкіндік берді. Сонымен қатар, жылу беру маусымына арналған қоймаларда нормативтерге сәйкес 5,2 млн тонна көмір және 88 мың тонна мазут жинақталған.
Министрлік өңірлердегі ағымдағы бірқатар мәселелерді бақылауда ұстайды.