Киевте қазақстандық журналист Айдос Садықовқа қастандық жасалды, деп хабарлайды almaty-akshamy.kz
Украиналық БАҚ-тарда қазақстандық журналист Айдос Садықовқа қастандық жасалғаны туралы ақпарат таралуда. «БАЙРАКТАР NEWS» телеграм арнасының мәліметінше, Садықовтың жағдайы ауыр.
«Алдын ала болжам бойынша, Киевте Айдос Садықовқа қастандық жасалды. Ол - қазақстандық журналист, «БАСЕ» оппозициялық интернет порталының басшысы. Жағдайы ауыр», - деп хабарлайды телеграм арна.
Бұған дейін телеграм арна Киевтің Шевченский ауданында атыс болғанын жазған болатын. Басылымның мәліметінше, тұрақта тұрған көлікте ер адам әйелімен отырған. Белгісіз біреу келіп, ер адамды атып жіберіп, қашып кеткен. Әйел адам жарақат алмаған.
Журналист Наталья Садықованың айтуынша, Айдос Садықовқа үйінің маңында қастандық жасалған.
Айта кетейік, Айдос Садықов Украинада ресми босқын мәртебесін алған. 2023 жылдың қазан айында Садықовқа Қазақстанда «әлеуметтік, ұлттық, рулық, тектік-топтық немесе діни алауыздықты қоздырғаны» үшін іздеу жарияланған болатын.