Алматы қаласында республикалық референдумды өткізу барысында дауыс беру рәсімінің ашықтығы қамтамасыз етілген. Учаскелердегі үдерісті қоғамдық бірлестіктер мен үкіметтік емес ұйымдардың өкілдері бақылап отыр, – деп хабарлайды aqshamnews.kz тілшісі.
Алматының Түрксіб ауданындағы №464 референдум учаскесінің бақылаушысы Ерлан Оспановтың айтуынша, дауыс беру белгіленген тәртіпке сәйкес ұйымдастырылған.
«Біз дауыс беру барысын бақылап, барлық рәсімнің сақталуын қадағалап отырмыз. Учаскелік комиссияның жұмысы талаптарға сай жүргізіліп жатыр. Дауыс беру тыныш жағдайда өтуде, азаматтар құқығын еш кедергісіз жүзеге асырып жатыр», — деді ол.
Алматының Алатау ауданындағы №545 референдум учаскесінің бақылаушысы Меруерт Саламасова да қоғамдық бақылаушылардың рөлін ерекше атап өтті.
«Бақылаушылардың қатысуы дауыс беру рәсімінің ашық әрі әділ өтуіне ықпал етеді. Біз барлық кезеңнің заң талаптарына және ашықтық қағидаттарына сай жүргізілуін қадағалап отырмыз», — деді ол.
Бақылаушылар күні бойы учаскелерде жұмыс істеп, референдумның өту барысын заңнамаға сәйкес бақылауды жалғастырып жатыр.