Қазақстан Журналистер одағы ЮНЕСКО қамқорлығымен Мәдениеттерді жақындастырудың халықаралық орталығымен бірлесіп, отандық БАҚ-тың қалыптасуына елеулі үлес қосқан, өмірден өткен қазақстандық журналистерді еске алуға арналған акция өткізді.
Аталмыш акция Қазақстан Журналистер одағының ғимаратында өтті. Шара ЮНЕСКО-ның білім қоғамдарын құру жөніндегі идеяларын іс жүзінде жүзеге асыру мақсатында Дүниежүзілік даму туралы ақпарат күніне сәйкес ұйымдастырылды.
Қазақстан Журналистер одағының төрағасы Сейітқазы Матаевтың айтуынша, акцияны ұйымдастыруға ақын, қоғам қайраткері Олжас Сүлейменов қолұшын созды. Бұл акция алғаш рет былтыр қазан айында өткен еді.
1972 жылы БҰҰ Бас Ассамблеясы Дүниежүзілік даму туралы ақпарат күнін құруға шешім қабылдады. Мақсаты – әлемдік қоғамның назарын түйткілді мәселелерге және оларды шешу үшін халықаралық ынтымақтастықты нығайтуға аудару. Ассамблея бұл күн негізінен Біріккен Ұлттар Ұйымы күні – 24 қазанмен сәйкес келуі керек деп шешті.
Қазақстанның бұқаралық ақпарат құралдары тұрақты әрі тәуелсіз болашақ құру, елдегі кедейлік, теңсіздік, қоршаған ортаның нашарлауы, бейбітшілік пен әділеттілік сияқты өзге де маңызды жаһандық мәселелерді шешуді қамтиды. Журналистік міндеттерін абыроймен атқарған отандық бұқаралық ақпарат құралдары өкілдерінің біразы бүгінде өмірден өтіп кетті. Сондықтан осы іс-шара еліміздің, қоғамның дамуына үлес қосқан, дер кезінде шынайы ақпарат таратқан журналистерді еске алуға арналады. Жиынға марқұм болған журналистердің жақын туыстары, қазақстандық баспасөз ардагерлері, сондай-ақ, көрнекті ақын және қоғам қайраткері Олжас Сүлейменов қатысты.
Шынайы ақпаратты уақытында жеткізу, қоғамдық пікір қалыптастыру – журналист үшін маңызды міндет. Бақилық болған журналистердің қызметтегі естеліктерімен бөліскен шара қатысушылары бірнеше ұсыныс та айтты. Болашақта журналистер туралы кітап та жазылуы мүмкін.
Былтыр акция басталғалы бері Қазақстан Журналистер одағы Алматы қаласы бойынша қайтыс болған журналистердің тізімін жасауды бастаған болатын. Қазақстан Журналистер одағының жауапты хатшысы Баян Рамазанованың айтуынша, бұл тізім әлі де жаңартылады. Себебі, журналистер өте көп. 5-6 облыстан тізім жіберілді. Тек қала бойынша ғана емес, еліміздің жер-жерінен журналистердің тізімі жасалады. Пандемиядан бөлек, басқа да емі жоқ аурудан қайтыс болған журналистердің есімі енгізіледі.
Айта кеткен жөн, «Alataý Аqparat» медиахолдингінің ғимаратында бүгінде өмірде жоқ журналистердің бұрын тұтынған заттары, диктофон, фотоаппарат, т.б. заттар сақталған.
Журналистердің қоғамдық өмірдегі еңбегі мен үлесін бірауыз сөзбен бағалау мүмкін емес. Қапыда қаза болған қазақстандық журналистер отандық БАҚ үшін айтарлықтай үлес қосты. Журналистерді еске алуға арналған шара 1 минут үнсіздікпен басталды.