Индонезияның әйгілі Бали аралына демалуға баратын шетелдіктер үшін талап қатаңдады. Енді саяхатшыларға діни нысандарда ашық-шашық киіммен жүруге болмайды, – деп хабарлайды aqshamnews.kz 24kz-ке сілтеме жасап.
Сондай-ақ қоғамдық орындарда әдеп нормаларын сақтау керек. Демалушыларға қалаған жерінде пластик секілді қоқыс тастап, қоршаған ортаны ластауға тыйым салынды. Рульге отырған азаматтарда халықаралық жүргізуші куәлігі болуы шарт. Тек жергілікті валютамен есеп айырысуға рұқсат. Бұдан бөлек, 150 мың рупий көлемінде туристік алым енгізіледі. Бұл біздің ақшамен 5 мың теңге шамасында.
«Мұндағы мақсат – туристік саланың сапасын арттырып, аралдың мәдени мұрасын сақтап қалу», – дейді билік.
Жаңа ережелерге бағынбағандар айыппұл төлейді, тіпті қамауға алынуы мүмкін.