Бүгін Алматының «Жетісу» шағынауданында көпқабатты үйлердің бірінің терезесінен жас әйел үш баласымен бірге секіріп кетті.
28 жастағы әйел мен оның 2015, 2016 және 2019 жылы туған үш кішкентай баласы 9-қабаттың терезесінен секіріп кеткен.Көршілерінің сөзінше, жас келіншек осы үйде бір бөлмелі пәтер жалдап тұрған, деп хабарлайды Almaty-akshamy.kz
Куәгерлердің айтуынша, жас ана алдымен балаларды терезеден лақтырып, артынан өзі секіріп кеткен.
«Ол үнемі балалармен аулада серуендеп жүретін. Оның екі қызы мен бір ұлы болды. Кенжесі үш жаста еді. Қарапайым отбасы сияқты көрінетін», - дейді қайғылы оқиға болған үйдің тұрғыны.
Әйел мен екі баласы оқиға орнында көз жұмды. Тағы бір бала жедел жәрдем көлігінде қайтыс болды.
«Бүгін таңертең болған оқиға өте қорқынышты. Алдымен анасы балаларын терезеден лақтырып жіберіп, артынша өзі секірді. Бәрі жерде жатты. Балаларға обал болды. Қаза тапқандардың отбасына көңіл айтамыз», - деді оқиға куәгері.