ҚР Оқу-ағарту министрінің шақыруымен ҚР Денсаулық сақтау министрі Ақмарал Әлназарова елордадағы білім беру ұйымдарының директорларымен кездесу өткізді. Бұл кездесу екі жақты ынтымақтастық мәселелерін талқылау, балалар мен жасөспірімдердің денсаулығын жақсартуға бағытталған бірлескен жобаларды жүзеге асыру, мектептерде медициналық қызметті ұйымдастыру, инклюзивті білім беру кабинеттерін дамыту және педагогтер мен оқушылардың денсаулығын сақтау мәселелеріне арналды, деп хабарлайды aqshamnews.kz
Министр Ғани Бейсембаевтың айтуынша, мемлекет басшысының тапсырмасымен 1,7 миллион оқушыны қамтитын мектептерде тегін тамақтандыру жүйесі енгізілген. Бұл шара балалардың білім алудағы нәтижелілігін арттыруға бағытталған маңызды қадамдардың бірі болды. Сонымен қатар, аймақтарда мектеп ас мәзірін өңірлік өнімдерді пайдалану арқылы жаңарту жұмыстары жүргізілуде, бракераждық комиссиялар құрылып, ата-аналар, мектеп әкімшілігі және медицина қызметкерлері бірлесіп бақылау жұмыстарын атқарып келеді.
Оқу-ағарту министрі балалардың қауіпсіздігі мен салауатты өмір салтын қалыптастыруға басымдық берілетінін, сондай-ақ кәсіпкерлердің өз жауапкершілігін сезінуі маңызды екенін атап өтті. Министр санитарлық-эпидемиологиялық шаралар мен құқықтық актілерді қайта қарау қажеттілігіне тоқталып, алдағы жылдарда ірі мектептерде стоматология кабинеттерін ашу жоспарланғанын мәлімдеді.
Министр Ақмарал Әлназарова сонымен қатар №95 мектеп-лицейі, №84 "Кәусар" балабақшасы және Астана қалалық мамандандырылған балалар үйінде болды. Кездесу соңында педагогтер Денсаулық сақтау министріне балалардың денсаулығына деген қамқорлығы үшін алғыстарын білдірді.