Атырауда 13 шілдеде балалар хлордан жаппай уланды. Бұл іске байланысты Palma аквапаркінің басшысы ұсталды, - деп жазады Аqshamnews.kz Аtyrau Online сайтына сілтеме жасап.
Атыраудың мамандандырылған тергеу сотының қаулысымен күдіктіге қатысты үйқамақ түріндегі бұлтартпау шарасы тағайындалды.
Еске салайық, төтенше жағдай Атыраудағы танымал демалыс орындарының бірінде болған. 14 бала медициналық көмекке жүгініп, олардың үшеуі облыстық және балалар ауруханаларына жатқызылған.
Үш баланың жағдайы ауыр болып, олар жансақтау бөліміне түсті.
Куәгерлердің айтуынша, бассейн ішінде кенет хлордың иісі күшейіп, су түсі өзгерген. Балалар жөтеліп, есінен танып құлай бастаған. Ата-аналар балаларын шұғыл эвакуациялап, жедел жәрдем шақырған.
Алдын ала болжам бойынша, оқиғаға хлорлы заттарды мөлшерден тыс қосу себеп болған. Бассейн иелері су тазарту жүйесінде ақау болғанын мойындады. Қазір нысан жабылып, ТЖД мен прокуратура тексеріс жүргізіп жатыр.