25 қазан – Республика күніне орай №169 мектеп-лицейінде «Менің қалам – менің мақтанышым» атты мерекелік концерт өтті. Іс-шара барысында оқушылар мен ардагерлер кездесті. Мерекелік концертке Алматы қаласының ардагерлер кеңесінің мүшелері, ұстаздар мен оқушылар қатысты.
– Бүгінгі іс-шара жалпы біртұтас тәрбиеге бағытталған. Түрлі тәрбие жұмыстарына байланысты әртүрлі шаралар ұйымдастырып жатырмыз. Негізгі мақсатымыз – жастар арасында біліммен қатар тәрбиені насихаттау. Республика күні қарттар айлығына сәйкес келіп отыр. Осы мерекені пайдаланып, алға жетектеуші ұрпақпен кейінгі буынды кездестіріп жатырмыз. Себебі қазақта «қарттар – біздің қазынамыз» деген жақсы сөз бар. Олар өздерінің ақыл-кеңестерімен бөлісіп, оқушыларға ізгі тілектерін айтады, – деді №169 мектеп-лицейінің директоры Патшагүл Алмағамбетова.
Мерекелік концерт барысында оқушылар өнерлерімен көрермендерді таңғалдырды. Бірі ән шырқаса, бірі қаламызға арнап өлең шумақтарын оқыды. Ардагерлер оқушылардың өнеріне тәнті болып, ізгі тілектерін білдірді.
– Бүгін үлкен мереке өтіп жатыр. Бұл мектеп туралы көп сөз айтуға болады. Бәріміз білетіндей, 1990 жылы БҰҰ 1 қазанды қарттар күні деп белгілеген болатын. Ал бізде Алматы қаласында бұл ай қарттар айлығы деп аталады. Бұл ай біз үшін үлкен мереке. Әртүрлі іс-шаралар, спорттық жарыстар мен кездесулер өткіземіз. Мұндай шараларды өткізудегі мақсатымыз – жастарды мектеп табалдырығынан бастап патриоттыққа тәрбиелеу. Үлкенді сыйлау, Отанды сүю, кішіге ізет көрсету сияқты жақсы қасиеттерді насихаттаймыз, – деді Алатау ауданы ардагерлер кеңесінің төрағасы Сағатулла Таубалды.