Байқоңыр қаласына кіріп-шығу тәртібі бірінші желтоқсаннан бастап жеңілдейді.
Қазақстан азаматтары үшін осындай оңтайлы шешім қабылданды, деп хабарлайды Almaty-akshamy.kz.
Мәселен қазір Байқоңырға сырттан келетін адам 10 күн бұрын қала әкімшілігіне өтінім жіберуі керек. Өйткені әрбір азамат шаһардың кіреберіс бақылау бекетінен жіті тексеріліп, рұқсат құжаты болса ғана өтеді. Бұл созбалаңға салған процесс қалаға келушілерге қиындық туғызып отыр. Дегенмен Қазақстан мен Ресейдің Үкіметаралық комиссиясында осы мәселе қаралып, көптің талап-тілегі ескерілді. Айта кетейік, бүгінде Байқоңыр қаласында 75 мыңға жуық тұрғын бар. Оның үштен екісі қазақстандық азаматтар.
«Келісімге өзгеріс енгізу бойынша ұсыныс енгізілді. Пилоттық режимде 1-желтоқсаннан бастап бір адам отырады. Кіреберісте отырып, Қазақстан азаматтарына бірден сол жерде рұқсатнама жазып беру туралы шешім қабылданды», - дейді ҚР Президентінің Байқоңыр кешеніндегі арнаулы өкілі Қайрат Нұртай.