Британдық диетолог дәрігер аз жеп, тез салмақ тастау әдісімен бөлісті, деп хабарлайды Almaty-akshamy.kz тілшісі Lenta.ru-ға сілтеме жасап.
Шетелдік Express басылымының жазуынша, британдық диетолог Майкл Мосли аз жеп, тез арықтауға көмектесетін әдістерді атаған.
Мослидің айтуынша, арықтаудың басты жауы - үйде зиянды тамақтың болуы. Дәрігер егер адам үйінде зиянды әрі дәмді тағамдар бар екенін біле тұра, өзінің еркіне қарсы тұра алмай, жаңағы аты аталған тамақтарды жеп қоюы мүмкін деп санайды. Маманның пікірінше, салмақ тастағысы келіп жүрген адамдар үшін ең қауіпті сәт - жұмыстан кейінгі уақыт, яғни адам күндізгі шаршағанынан тыныққысы келіп, босаңситын, яғни фильм немесе сериал көретін кез.
«Егер сіз теледидар алдында отырсаңыз және жаныңызда балмұздақ пен печенье жатса, сіз оларды қалай жеп тастағаныңызды байқамай қалуыңыз да мүмкін. Экран алдында жайғасқан кезде біз ойланбай жеуге бейімбіз», — деп атап өтті Мосли. Сондықтан да ол арықтау және қызығып әр нәрсені жей бермеу үшін тәтті мен калориясы жоғары азық-түлік өнімдерін алмауға кеңес береді.
Көрікті дене мүсінін сақтағысы келетін немесе артық салмақтан арылғысы келетіндерге дәрігер көлемі шағындау келген тарелкаларды пайдалануды ұсынады. Ол осы әдіс арқылы ыдыстағы тамақ порциясы көп көрінетінін және соған сәйкес, адам өзіне қосымша ас салып алмайтынын және артық жеу қаупі азаятынын айтып түсіндірді. «Бүгінгі таңда тарелкалардың орташа көлемі 28,5 сантиметрді құрайды, бұл 1940 жылдарға қарағанда сегіз сантиметрге қарағанда үлкенірек», — деді диетолог.
Бұған дейін британдық диетолог-дәрігер Майкл Мосли арықтауға жақсы әсер ететін сусынды және оны қандай мөлшерде тұтыну керектігін айтқан болатын. Артық салмақтан арылып, өз денсаулығын күтетін адамдарға ол әрбір тамақ ішер алдында бір стакан су ішуді ұсынды.