Әлеуметтік желілерде осы жағдайға байланысты видео таралғаннан кейін, мектеп оқушысы автобус ішінде өзіне ер адамның шабуыл жасағанын мәлімдеді. Оқиға 6 желтоқсанда болған, деп хабарлайды aqshamnews.kz.
"Ол бәлкім, ішімдік ішіп, масаң күйде болған болар. Аяғымнан теуіп, мені оятқаннан кейін басталды. Аузына келгенді айтып, маған қарай ұмтылды. Бетіме тиген соққыдан көзілдірігім сынды", - деді қыз екінші видеода.
Мектеп оқушысы полицияға арыз жазды. Алматы қаласының полиция департаменті агрессивті ер адамды іздестіріп жатқанын хабарлады.
"Әуезов ауданының полиция басқармасы құқық бұзушының жеке басын анықтау, оны ұстау және жауапқа тарту үшін кешенді шаралар жүргізуде", - деп мәлімдеді Алматы полиция департаментінің баспасөз қызметі.
Кейіннен полиция құқық бұзушының жеке басын анықтап, оны ұстағаны туралы хабарлады.