Кеңес әскерінің шектеулі контингентін Ауғанстаннан шығару күніне арналған айлық аясында №36 қалалық емханада ауған соғысы ардагерлері үшін бірқатар іс-шара өтті.
Емхана дәрігерлері мен мамандары соғысқа қатысушылардың денсаулығы мен психологиялық жағдайына ерекше назар аударды, деп хабарлайды aqshamnews.kz.
Маңызды шараның бірі - психолог пен әлеуметтік қызметкерлердің қатысуымен өткен психологиялық тренинг болды. Шараға қатысушылар қажетті қолдау алып, бейімделу, стреске төзімдік және психикалық денсаулыққа қатысты маңызды мәселені талқылады. Кездесу жылы әрі сенімді атмосферада өтті.
Сонымен қатар емханада Ашық есік күні ұйымдастырылды. Бұл күні ардагерлер кешенді медициналық тексеруден өтті. Қабылдауды тар бейінді мамандар - кардиолог, уролог, офтальмолог, невропатолог және эндокринолог жүргізді. Дәрігерлер тек диагностика жасап қана қоймай, барлық сұраққа толық жауап берді.
Тексеру нәтижесі бойынша ардагерлерге қосымша ЭКГ, МРТ, УДЗ және басқа да қажетті диагностикалық зерттеуге жолдама берілді. Бұл олардың денсаулық жағдайын толық бағалап, дер кезінде ем тағайындауға мүмкіндік берді.
№36 қалалық емхана ардагерлерге жан-жақты медициналық және психологиялық қолдау көрсетуді жалғастырып, олардың тарихтағы рөлін мойындап, денсаулығына қамқорлық жасауды басты назарда ұстайды.