Атырау облысының медицина саласында 201 дәрігер жетіспейді. Бұл туралы облыстық денсаулық сақтау басқармасының басшысы Асхан Байдуәлиев мәлім етті, деп хабарлайды Almaty-akshamy.kz Inform.kz-ке сілтеме жасап.
Облыстық қоғамдық кеңестің кеңейтілген отырысында медицина саласын кадрмен қамту мәселесі қаралды. Облыстық денсаулық сақтау басқармасының басшысы Асхан Байдуәлиевтің айтуынша, өңірде медицина саласындағы кадр жетіспеушілігін жою мақсатында бірқатар жұмыс қолға алынған.
«Атырау облысының медицина саласында 201 дәрігер жетіспейді. Ауруханалар мен емханаларда, өзге емдеу орындарында реаниматолог, акушер-гинеколог, инфекционист, жалпы тәжірибе дәрігері, педиатр секілді жоғары білімді кадрлардың орны бос тұр. Ауылдық жерлердегі медицина мекемелеріне 40 дәрігер қажет», -деп мәлім етті басқарма басшысы Асхан Байдуәлиев.
Оның айтуынша, қазір Атырау облысында 6 747 медицина қызметкері жұмыс істейді. Оның ішінде 1 515 дәрігер, 5 232 орта буын медицина қызметкері тұрғындарға медициналық көмек көрсетіп жүр.
«Жоғары медициналық оқу орнын бітірген Атырау облысының түлектерін білікті дәрігер ретінде білімін одан әрі резидентурада жалғастыруына жағдай жасау мақсатында жыл сайын 70-тен астам грант бөліп отыр. Мәселен, 2021 жылғы желтоқсанда Атырау облысында Ақтөбе қаласындағы М.Оспанов атындағы Батыс Қазақстан медициналық университетінің филиалы ашылды. Қазір басқа өңірлерден келген 35 резидент облыстағы медициналық мекемелерде жұмыс істеп жүр. Қабылданған осындай шаралардың нәтижесінде кадр тапшылығы былтыр 2020 жылмен салыстырғанда 11%-ға төмендеді», -деді Асхан Байдуәлиев.