Мәулен Әшімбаев бастаған АЭС салуды қолдау жөніндегі халықтық штабтың Алматы қаласындағы кездесуінде энергетикалық қауіпсіздік пен АЭС құрылысының маңызы талқыланды. Штаб құрамында депутаттар, сарапшылар, қоғам қайраткерлері, сондай-ақ Қазақстан халқы Ассамблеясының өкілдері болды.
Мәулен Әшімбаев Мемлекет басшысы бастамашы болған АЭС салуға қатысты республикалық референдумның елдің дамуы үшін маңызды қадам екенін атап өтті. Оның айтуынша, электр энергиясына деген сұраныс артып келеді, бұл – әлемдік үрдіс. Сондықтан электр энергиясы көздерін әртараптандыру Қазақстан үшін өте өзекті болып отыр.
АЭС салу стратегиялық мәнге ие, өйткені электр қуатын тұрақты түрде өндіру елдің экономикасы мен дамуына жаңа серпін беріп, энергетикалық тәуелсіздікті қамтамасыз етеді. Сонымен қатар атом энергетикасы ғылымды қажет ететін сала болғандықтан, ол жоғары білікті мамандар даярлауға, инновацияларды өндіріске енгізуге және экономиканы дамытуға ықпал ететінін айтты.
АЭС құрылысы мыңдаған жаңа жұмыс орнын ашуға мүмкіндік беріп, басқа да салаларда қосымша жұмыс орындарын қамтамасыз ететін мультипликативті әсерге ие.
Кездесулер барысында референдумға қатысушылардың дауысы шешуші рөл атқаратыны және бұл қадам елдің дамуына жаңа бағыт беретінін ерекше атап өтті.