Алматыға танымал түрік актері Бурак Өзчивит келді
“Негіз: Осман”, “Сұлтан Сүлеймен”, “Бозторғай” сынды түрік сериалдарында басты рөлді сомдаған әлемге әйгілі актер Бурак Өзчивит Алматыдағы ауқымды жобаның таныстырылымына қатысты.
Актер Қазақстандағы құрылыс нарығындағы үлкен компаниялардың бірі — RAMS Global-дың жаңа бастамасын қолдау үшін Алматыға келді.
Баспасөз конференциясы барысында Бурак Өзчивит журналистердің сұрағына жауап беріп, Алматы мен жобадан алған әсерін бөлісті. Ол бұл жобаның ресми амбассадоры ретінде сөз сөйлеп, компанияның халықаралық деңгейдегі жоғары сапасын ерекше атап өтті.
Бурак Өзчивит бұған дейін де Алматыға бірнеше рет келіп кеткен. Әлеуметтік желілердегі парақшасында «Ата-бабаларымыздың жерінен сәлем» деп жазба қалдырған. Бұл сапарында да қаланың тарихи және мәдени мұрасына деген қызығушылығын жасырмады.
“Қазақстанға кейінгі 10 жыл ішінде жиі келіп жүрмін. Әр келген сайын бұл елдің азаматтарымен шығармашылық бағытта, түрлі жобалар аясында бірлесе жұмыс істеу жөнінде әңгімелестік. Мұнда мені әрдайым жылы қабылдайды, өзімді туған үйімде жүргендей сезінемін. Атажұртқа қайта оралу — мен үшін үлкен қуаныш әрі жүрекке жақын сезім. Бұл топырақ — біздің ата-бабаларымыздың ізі қалған киелі жер. Қазақстан менің жүрегімде ерекше орын алатын елге айналды. Атажұртқа әркез келуге дайынмын”,- деді Бурак Өзчивит.