Астанада ет өнімдерін сататын сауда нысандарын тексеру барысында шығу тегі белгісіз 6 тоннадан астам ет айналымнан алынды, деп хабарлайды Aqshamnews тілшісі ІІМ баспасөз қызметіне сілтеме жасап.
Ведомство хабарлауынша, ветеринарлық инспекциямен бірге жүргізілген рейд кезінде ет өнімдерінің құжаттары мен санитарлық талаптарға сәйкестігі тексерілген. Тексеру нәтижесінде сапасы белгісіз үлкен көлемдегі ет анықталып, ветеринарлық инспекцияға жіберілді.
Қалалық базарлар мен ресми ет өңдеу кәсіпорындары да бақылаудан өтті. Рейд барысында санитарлық нормаларды өрескел бұзған төрт жерасты цехы анықталды. Ондағы күмәнді өнімдер тәркіленіп, аталған фактілер бойынша тексерулер жалғасып жатыр.
ІІМ мәліметінше, ауыл шаруашылығы жануарларын есепке алу мен сәйкестендіру ісіне ерекше көңіл бөлінген. Стационарлық бекеттер мен жолдарда мал және ет тасымалдаған 200-ден астам көлік тексерілген.
Сонымен қатар, полиция қызметкерлері жеке секторларды да аралап, үй жануарлары мен мал ұстаушылардан қажетті құжаттар мен ветеринарлық анықтамаларды талап еткен.