Астанада үш жұмысшының бесқабатты ғимараттың биіктігінен құлап жарақат алуына байланысты полиция департаменті қылмыстық іс қозғады, деп хабарлайды Aqshamnews тілшісі.
Ведомство мәліметінше, оқиға құрылыс жұмыстары жүргізіліп жатқан нысанда болған. «Құрылыс жұмыстарын жүргізу кезінде қауіпсіздік ережелерін бұзу» бабы бойынша қылмыстық іс тіркелген.
Полиция қызметкерлері үш адамның құрылыс кабинасынан құлауынан жарақаттанғанын нақтылады. Қазір оқиғаның барлық мән-жайы анықталып жатыр.
Еске салайық, бұған дейін зардап шеккендердің бірінің ұлы Рақым Әділгерей оқиға 18 қарашада сағат шамамен 11:00-де болғанын айтқан. Оның сөзінше, жұмысшылар шамамен 15 метр биіктіктен — Күлтегін көшесі, 16 мекенжайындағы салынып жатқан Attila тұрғын үй кешенінің бесінші қабатынан құлаған.
Ұлттық шұғыл медицинаны үйлестіру орталығының мәліметінше, сол күні үш ер адам ауыр жарақаттармен медициналық мекемеге жеткізілген.