Астанада №1 қалалық ауруханада жұмыс істеген медбикеден туберкулез анықталды. Әлеуметтік желіде тараған ақпаратты қалалық Денсаулық сақтау басқармасы растады, деп хабарлайды Aqshamnews.kz тілшісі.
Басқарма дерегінше, медбике жұмысқа рұқсат алған және туберкулез бойынша байланыста болған адамдар қатарында тұрған.
Ол соңғы рет 2026 жылдың ақпан айында емханада флюорографиядан өткен. Ол кезде түсірілімде патология анықталмаған. Ал сәуір айында медициналық көмекке жүгінгеннен кейін ауру белгілі болған. Медбике соңғы рет 24 сәуірде жұмысқа шыққан. Қазір ол қалалық фтизиопульмонология орталығында ем қабылдап жатыр.
Оқиғадан кейін соңғы флюорографиялық тексеруден бері 6 ай және одан көп уақыт өткен 39 қызметкер қайта тексерілген. Олардың бәрінен теріс нәтиже шыққан.
Сондай-ақ басқарма медбикемен соңғы үш айда байланыста болған адамдардың тізімі анықталғанын мәлімдеді. Олардың арасында ауру жұқтырғандар бар-жоғы әзірге хабарланған жоқ.
Осы жағдайдан кейін ауруханада төсек-жабдықтар мен матрастарға дезинфекция жүргізілген.
Былтыр осыған ұқсас жағдай Ақтөбе облысында да болған. Ақтөбедегі көпбейінді балалар ауруханасында ашық түрдегі туберкулезі бар медбике жұмыс істеген еді.