20 қыркүйекте Астана қаласындағы Сарайшық ауданында Жұмысшы мамандықтар жылы аясында жаңа сквер – Жұмысшы мамандықтар аллеясы ашылды. Бұл алаң еңбек адамдарына деген құрметтің, сондай-ақ жұмысшы кәсіптердің ел дамуына қосқан үлесінің символына айналды.
Салтанатты іс-шараға қала тұрғындары, түрлі сала мамандары, қоғам белсенділері мен депутаттар қатысты. Сарайшық ауданы әкімі Мақсат Саматұлының айтуынша, бұл бастама Мемлекет басшысының 2025 жылды Жұмысшы мамандықтар жылы деп жариялауына орай жүзеге асырылған.
Мерекелік шараның жарқын сәттерінің бірі – арнайы муралдың ашылуы болды. Онда түрлі жұмысшы мамандық иелері бейнеленген.Скверді абаттандыру жұмыстары 3 ай бойы жүргізіліп, ашылу күні толық аяқталды. Жобалау барысында аудан тұрғындарының ұсыныстары ескеріліп, аллея жергілікті халықпен бірлесе отырып жасақталды.
Шара барысында 400-ден астам қылқан жапырақты ағаш отырғызылды.
– Жергілікті тұрғындар дәл осы жерде сквер болса екен деп тіледі. Біз сол арманды іске асырдық. Енді бұл орын қала тұрғындарының сүйікті демалыс орнына айналатынына сенемін, – деді Мақсат Саматұлы.
Аллея – еңбекке құрметтің белгісі, жұмысшы кәсіптерді дәріптейтін мәдени және әлеуметтік іс-шаралар өтетін алаң болады. Сонымен қатар, шара барысында «Еңбек жолы» байқауының жеңімпаздары да марапатталып, еңбек саласының үздіктері лайықты бағасын алды.