Елорданың Есіл ауданында орналасқан екі қабатты дәмханалардың бірінде өрт шықты. Төтенше жағдайлар министрлігі мамандарының жедел әрекетінің арқасында тілсіз жау ғимаратқа толық жайылмай, дер кезінде ауыздықталды, деп хабарлайды Aqshamnews.kz тілшісі.
Алдын ала мәліметке сәйкес, өрт туралы хабарлама демалыс күні кезекші бөлімге түскен. Оқиға Елубай Тайбеков көшесі бойындағы қоғамдық тамақтану орнында болған. Құтқарушылар жеткен сәтте ғимаратты қою түтін басып, от бірінші және екінші қабаттағы жиһаздарды шарпыған. Өрттің жалпы аумағы 80 шаршы метрді құраған.
Өрт сөндіру бөлімшелерінің үйлесімді жұмысының нәтижесінде жалынның нысанның басқа бөліктеріне таралуына жол берілмеді. Қаза тапқандар мен жарақат алғандар жоқ, ғимараттың негізгі құрылымдары аман қалған. Қазір өрттің шығу себептері мен материалдық шығын көлемі анықталып жатыр.