Астанада полиция қызметкерлері бесінші қабаттағы балконның терезесінен секірейін деп тұрған әйелді құтқарып қалды, - деп хабарлайды aqshamnews.kz тілшісі.
Полиция департаментінің мәліметінше, таңертең "102" нөміріне қаладағы тұрғын үй кешендерінің бірінде әйелдің бесінші қабаттағы терезе карнизінде тұрғаны және төмен құлап кетуі мүмкін екені туралы хабарлама түскен. Оқиға орнына бірден патрульдік полиция экипажы жетті.
Пәтер есігін ашқан тәртіп сақшылары терезе шетінде тұрған 27 жастағы әйел адамды көрді.
Қауіп деңгейін бағамдағаннан кейін полицейдің бірі әйелмен сөйлесіп, оның күйзелісін азайтуға тырысып бақты. Оның назарын басқа жаққа аударған сәтте патруль қызметкері терезеден тартып шығарып алды, осылайша қауіпті жағдайдың алдын алды.
"Қазір оған психологтар көмектесіп жатыр, оқиғаның мән-жайы анықталып жатыр" – деп хабарлады полиция.