Астанада әлеуметтік желі арқылы адамдарды алдаған азаматшаға қатысты сот үкімі шықты, – деп хабарлайды aqshamnews.kz тілшісі.
Қалалық прокуратураның мәліметінше, сотта ақпараттық жүйелерді пайдаланып, бірнеше рет алаяқтық жасаған тұрғынға қатысты мемлекеттік айыптау толық дәлелденген. Тергеу деректеріне сай, ол Instagram желісінде “тиімді инвестиция”, “арзан туристік жолдама” және шетелде жұмысқа орналастыру туралы жалған хабарландырулар жариялаған. Азаматтардың сеніміне кіріп, ақша алып, кейін уәде еткен қызметтерін орындамаған және қаражатты өз қажеттілігіне жұмсаған.
Нәтижесінде 10 адам зардап шегіп, келтірілген материалдық шығын 7,7 млн теңгеден асқан.
Сот үкімімен кінәлі азаматша 6 жылға бас бостандығынан айырылды, жәбірленушілердің азаматтық талап-арыздары қанағаттандырылды. Үкім заңды күшіне енді.
Прокуратура тұрғындарды әлеуметтік желілер мен мессенджерлерде сақ болуға, интернеттегі “жеңіл табыс”, арзан тур мен инвестиция туралы күмәнді ұсыныстарға сенбеуге, онлайн қызмет ұсынатын тұлғаларды мұқият тексеруге және алаяқтық белгілері байқалса, дереу құқық қорғау органдарына жүгінуге шақырды.