"Қазгидромет" Астана тұрғындарына ескерту жасады, - деп хабарлайды Aqshamnews.kz тілшісі.
"4 тамызда Атырау және Астана қалаларында түнде қолайсыз метеорологиялық жағдай болады", – делінген хабарламада.
Анықтама: Қолайсыз метеожағдайлар – бұл жерге жақын атмосфера қабатында зиянды (ластайтын) заттардың жиналуына ықпал ететін қысқа мерзімді метеорологиялық факторлардың (тынық ауа, әлсіз жел, тұман, инверсия) үйлесімі.
Инверсия – бұл жылы ауа қабаты суық ауаның үстінен орналасып, оны "жауып" тұратын ауа райы құбылысы. Әдетте, жер бетіндегі жылы ауа жоғары көтеріліп, ластаушы заттарды өзімен алып кетеді. Бірақ инверсия кезінде суық ауа төменде қалып, сол ауамен бірге барлық газ, шаң мен түтін де жер бетінде тұрып қалады. Нәтижесінде, әсіресе қалаларда, ластану күшейеді.
Астанадағы ауа райы
4 тамызда елордада көшпелі бұлтты ауа райы болады, жауын-шашын күтілмейді. Жел солтүстік-шығыстан соғады: түнде жылдамдығы 3–8 м/с, күндіз 9–14 м/с. Ауа температурасы түнде +9...+11°С, күндіз +18...+20°С шамасында болады.
Қазақстандағы тамызда ауа райы қандай болады?
Бұған дейін "Қазгидромет" синоптиктері 2025 жылғы тамызға арналған ауа райы болжамын ұсынған болатын. Жаздың соңғы айы елдің басым бөлігінде жылы болады деп күтіледі. Алайда республиканың оңтүстігі мен оңтүстік-батысында ауа температурасы климаттық нормадан жоғары болады.