Қазақстан Республикасының Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде ҚХА-ның елдегі қоғамдық келісім мен ұлттық тұтастықты сақтаудағы ерекше рөлін атап өтті. Бұл туралы Aqshamnews.kz сайты хабарлайды.
Мемлекет басшысы түрлі жылдары елімізде құрылған қоғамдық диалог алаңдары мен құрылымдарды атап өте отырып, Ассамблеяның бүгінде ұлттық бірегейлікті бекітуде теңдессіз басты платформаға айналғанын ерекше белгіледі.
"Бүгінгі мерейтойлық жиында Ассамблеяның қоғамды ортақ мақсатқа жұмылдыру мен ұлттық бірегейлікті бекіту ісінде баламасы жоқ басты платформаға айналғанын және алдағы уақытта да солай болып қала беретінін атап өткім келеді", – деді Тоқаев.
Президент Ассамблеяның тек қоғамдық институт қана емес, мемлекеттігіміздің негізін құрайтын аса маңызды құрылым екенін баса айтты. Оның айтуынша, бұл ҚХА-ға артылатын тарихи жауапкершіліктің де зор екенін білдіреді.
"Ұлттық мүдделерімізді қорғап, егемендігімізді нығайту – қастерлі парыз. Мұны Ассамблея мүшелері терең сезінеді деп ойлаймын", – деді Мемлекет басшысы.
Қасым-Жомарт Тоқаевтың бұл пікірі Ассамблеяның рөлі тек этносаралық татулықпен шектелмей, елдік мұраттар мен ұлттық тұтастықты нығайтуға бағытталғанын көрсетеді.