Қазақстан Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде ҚХА-ның ел ішіндегі еңбек мәдениетін нығайтудағы маңызын атап өтті. Бұл туралы Aqshamnews.kz сайты хабарлайды.
Мемлекет басшысы Ассамблеяның тек этносаралық келісімді ғана емес, кәсібилік пен еңбекқорлық сияқты қоғам үшін маңызды құндылықтарды да насихаттап келе жатқанын айтты. Оның айтуынша, Ассамблея мүшесі Александр Папп «Жұмысшы мамандықтары жылын» өткізуге белсене атсалысқан.
Сондай-ақ, өткен жылы Еңбек күніне орай Сенат пен Мәслихат депутаттары Ассамблея мүшелерімен бірге еліміздің ірі кәсіпорындарына барып, еңбек ардагерлеріне құрмет көрсеткен. Президент бұл бастаманы жаңа дәстүр ретінде жалғастыруды ұсынды.
"ҚХА бүгінде қоғамдық келісімнің бірегей инфрақұрылымын қалыптастырған қуатты тармақтары бар институтқа айналды. Жер жүзінде мұндай бірегей ұйым құра білген мемлекет кемде-кем", – деді Тоқаев.
Президенттің айтуынша, Ассамблеяның арқасында елдегі барлық этностар Қазақстандағы оң өзгерістердің бел ортасында жүр.