15 қараша – Ұлттық валюта күні және қаржы жүйесі қызметкерлерінің кәсіби мерекесі. Бүгінде есеп-қисаптың жілігін шағып, майын ішкен майталман мамандар жетерлік. Солардың бірі – Ұлттық ұланның Алматыдағы «Оңтүстік» өңірлік қолбасшылығына қарасты Бауыржан Момышұлы атындағы 5571 әскери бөлімінде қызмет атқаратын қаржы бөлімінің офицері лейтенант Гүлжан Баймұханова.
Бұл сала алдымен мұқият болуды талап етеді. Өйткені сандар қателескенді кешірмейді. Ал сол сандарды «сайрата» білген сала маманы бүгінде Ұлттық ұланның сапында абыроймен қызметін атқаруда.
Гүлжан Бағдатқызы Қарағанды облысының тумасы. 2000 жылдан бері Алматы қаласында тұрады. Алматы экономикалық колледжін қаржы мамандығы бойынша, одан жоғары оқу орнын бітірген. 2009 жылы қазақ әскерінің алдыңғы шебі саналатын Ұлттық ұлан қатарына шақырылады. Сәйкесінше әскери қызметшілерге қойылатын талап та, тәртіп те қаржы маманына қатар қойылды. Нәп-нәзік болмысқа ие кейіпкеріміз ойланбастан ер азаматтармен қатар иық түйістіріп, Отан үшін титтей де болсын қосқан үлесім деп қызметке кіріседі. Әскери Жарғыға бағынады. Отан алдындағы әскери Антты да қабылдайды.
Оның бұл салаға бет бұруына анасының тікелей қатысы бар. Өйткені анасы ұзақ жылдар қаржы маманы болып жұмыс істеді. Есінде, бала күнінде анасы түнімен қат-қат қағаздардың ортасында май шаммен, есепшотты сарт-сұрт қағып ұзақ отыратын.
– Осы уақытқа дейін түсінгенім, адамның тағдырына жазылғаны болады екен. Қызығы, менің армандар тізбегімде әскери адам болу мүлдем болмаған. Әдетте погон таққан, форма киген жандарға көпшілік қызығады ғой. Ал, менікі керісінше, қызметке кіріскеннен кейін ғана мамандығымды сүйе бастадым. Иә, басында қыз баласы үшін оңайға соқпады. Өйткені, ер азаматтар сынды зонт киіп, окоп қазып, қатал талап пен тәртіпке бағындық. Содан еш жаман болған жоқпыз, өстік, өндік, үйрендік. Отбасымызда да, бала тәрбиесінде де осы жақтан көрген түйгенімізді, өмірлік сабақтарымызды қолданып келемін, – дейді лейтенант Гүлжан Баймұханова.
Өмірлік серігін де осы саладан жолықтырды. Сонау 2009 жылы Ұлттық ұланға қабылданған кезде қатардағы жауынгер болды. Сол тұста келісімшарт бойынша әскери қызметшілерді қадағалайтын, білмегенін үйрететін жауапты басшысы прапорщик Ермек Баймұханов еді. Сол басшысы қазір адал жар, шаңырағаның тірегі, екі қызының әкесі. Азаматы тұрғанда Гүлжан үшін еш нәрсе қиын емес.