Бұрынғы мәдениет және спорт министрі, Ұлттық музейдің бұрынғы директоры Арыстанбек Мұхамедиұлына қатысты тағы бір сот отырысы өтіп жатыр. Бұл жолы бұрынғы шенеунік рейдерлік жасады деген күдікке ілінді, - деп хабарлайды аlmaty-akshamy.kz Massaget.kz-ке сілтеме жасап.
Айыптау нұсқасына сәйкес 2019 жылы материалдық көмек алу үшін иелігінде Астанада орналасқан "Дипломат" қонақүй кешені бар кәсіпкер К. экс-шенеунік Мұхамедиұлына жүгінген. Мұхамедиұлы коммерсантқа 2,5 миллиард теңге беруге келіскен, алайда оның орнына ЖШС капиталынан қайын енесіне 71 пайыз рәсімдеуді сұраған. Тергеу мәліметінше, экс-шенеунік сол кезде-ақ қонақ үйді қолына алу жоспарын ойластырған.
Мәміле жасалғаннан кейін бұрынғы шенеунік қонақүйге үнемі бара берген, онда қызметкерлерге тең иелердің бірі ретінде таныстырылған. Әрі қарай Мұхамедиұлы кәсіпкер К.-ден қалған 29 пайызын беруді талап еткен, алайда кәсіпкер бас тартқан. Содан кейін Мұхамедиұлы "Дипломат" қызметкерлеріне ЖШС директорын қонақүйге кіргізбеу туралы бұйрық береді. Сонымен қатар, серіктестік қатысушыларының жалпы жиналысының хаттамасы қолдан жасалып, онда серіктестік директоры Мұхамедиұлына байланысты тұлғаға ауыстырылады.
Арыстанбек Мұхамедиұлы сотта тағылған айыппен келіспей, жәбірленушіні саясаткер Марк Юниус Брутпен, ал өзін Гай Юлий Цезарьмен салыстырған жалынды сөз сөйледі.
"Рим империясының тарихынан Марк Юниус Брут бүкіл адамзат тарихында айлакерлік пен зұлымдықтың символы ретінде қалғанын жақсы білеміз. Ал Гай Юлий Цезарь Бруттың зұлымдығына қарамастан, тарихта "сен Брутсың" деген сөздің авторы ретінде қалды" - деді Мұхамедиұлы.
Мұхамедиұлының пікірінше, судья тарихта Геракл ретінде қалады.
"Авгий патшаның қораларын көңнен тазартқан ежелгі батыр Геракл сияқты осы сот ісіндегі зұлымдық пен өтірікті тазалайтыныңызға сенімдімін", - деді ол судьяға.