Себебі, көршілес елдерде «стелс-омикрон» штамы тіркеліп жатыр.
«Егемен Қазақстан» басылымына сұхбат берген Премьер-Министрдің орынбасары Ералы Тоғжанов осылай деді, деп хабарлайды Almaty-akshamy.kz
Вице-премьердің айтуынша, қауіп барынша төмендеген. Бүгінде осы вируспен ауырудың ең төменгі деңгейі сақталып тұр, яғни тәулігіне шамамен 20 науқастай ғана анықталып отыр.
«Індет қарқынының бәсеңдеуіне Қазақстанда ғана емес, бүкіл әлемде жағдайдың тұрақтанғаны ықпал етіп жатыр. Әрине, біз жаңа «рецидивтерді» жоққа шығармаймыз, жаңа штамдардың пайда болуын ескере отырып, арқаны кеңге салуға әлі ерте екенін білеміз. Ең бастысы, біз коронавируспен күресуді үйрендік. Бүгінде қалыпты өмірге оралудың уақыты келді деп ойлаймын. Адамдардың тыныш өмір сүруіне, толыққанды жұмыс істеуіне, қорықпай қарым-қатынас жасауына мүмкіндік болуы керек. Осындай мүмкіндіктерді кеңейту мақсатында біз ең маңызды шектеулердің бірін жойдық, көршілес үш елмен: Ресей, Өзбекстан және Қырғызстанмен құрлық шекарасын аштық. Көптеген мемлекетпен әуе қатынасы қайта жанданды. 57 ел үшін визасыз режім қалпына келтірілді. Бұл ретте Қазақстанға кірерде ПТР-тестілеуді міндетті шарт ретінде қалдырдық. Өйткені бұл – эпидемиялық жағдайды бақылауға көмектесетін шаралардың бірі. Сонымен қатар ұжымдарда, адамдар көп жиналатын жерлерде маска тағу талабын күшінде қалдырдық. Халық, негізінен, осыған дағдыланып та қалды. Жапония, Қытай, Сингапур сияқты көптеген елде пандемиядан бұрын да маска тағу режімі қалыпты жағдайға айналған, себебі жұқпалы аурулардың басқа да көптеген түрі бар», - деді Ералы Тоғжанов.