Қазақстанда өнеркәсіптік мақсатта өсіруге рұқсат етілген қарасора сорттарының тізімі бекітілді, - деп хабарлайды Aqshamnews.kz тілшісі.
Қазақстан өнеркәсіптік мақсатта қарасора өсіруге ресми түрде рұқсат берді. Үкімет құрамында тетрагидроканнабинол (THC) мөлшері аз, яғни есірткілік әсері жоқ қарасора сорттарының тізімін бекітті. Бұл заңға 30 маусымда мемлекет басшысы қол қойған еді.
Ауыл шаруашылығы министрлігінің мәліметінше, өнеркәсіптік қарасора тек заңда көрсетілген 218 сорт бойынша өсіріледі. Үкімет қаулысы 22 қыркүйекте жарияланды және жарияланған күннен кейін 10 күн ішінде күшіне енеді.
"Есірткі және психотроптық заттарды өндірумен байланысты емес өнеркәсіптік мақсатта өсіруге рұқсат етілген қарасора (каннабис) сорттары бекітілсін", - делінген қаулы мәтінінде.
20 елдің сорттары енгізілді
Рұқсат етілген қарасора сорттары әлемнің 20 елінен әкелінген:
-
Еуропа: Германия, Италия, Франция, Польша, Венгрия, Латвия, Словакия, Чехия, Эстония, Украина, Румыния, Финляндия
-
Азия: Қытай, Жапония
-
Солтүстік Америка: АҚШ, Канада
-
Латын Америкасы: Мексика
-
Океания: Аустралия, Жаңа Зеландия
-
Ресей
Ресми тізімде өнеркәсіптік қолдануға арналған сорттардың арасында ерекше атаулар кездеседі: «Мама Мария», «Джуди», «Джой», «Марина», «Виктория», «Анжело», «Энджи», «Арманка», сондай-ақ «Омегадар-1», «Сириус», «Вега», «Зоряна», «Холодный Хан», «Самоцвет Банди», «Тигра» сияқты сорттар бар.
Еске салайық, бұған дейін Ішкі істер министрлігі Солтүстік Қазақстан облысында қарасора өсіруге төрт лицензия берілгенін хабарлаған болатын.