Ұлы Жеңіс мерекесі қарсаңында «Amanat» партиясының Бостандық аудандық филиалы мен Алматы қалалық мәслихатының депутаты Ералы Сауранбаев ғасыр жасаған майдангер, Ұлы Отан соғысының ардагері Александр Журавлевті арнайы құттықтап, құрмет көрсетті.
Салтанатты кездесуге Құрманғазы атындағы Қазақ ұлттық консерваториясының студенттері де қатысып, үрмелі аспаптарда патриоттық шығармалар орындап, ардагерге рухани сый жасады.
Александр Степанович Журавлев 1925 жылы 30 мамырда Ресейдің Алтай өлкесінде дүниеге келген. 1943 жылы әскерге шақырылып, Карел, кейін 1-ші Украин майдандарында байланысшы және барлаушы ретінде шайқастарға қатысқан. Ол Эльба өзенінен өтіп, Берлин түбіндегі ұрыстарға дейін жеткен. Соғыстан соң Будапештте әскери қызметін жалғастырып, 1950 жылы бейбіт өмірге оралған.
Ардагердің жауынгерлік ерлігі мен бейбіт өмірдегі еңбегі жоғары бағаланып, «Құрмет» орденімен және «Жауынгерлік ерлігі үшін», «Берлинді алғаны үшін», «Праганы алғаны үшін» медальдарымен марапатталған.
Ерлік пен елдік үлгісін көрсеткен ардагерге көрсетілген бұл құрмет – бүгінгі ұрпақтың алғысы мен тағзымы. Жеңісті жақындатқан жауынгерлердің өмір жолы – ел жадында мәңгі сақталатын ұлы аманат.