Тіршілік көзі алқапты суғаруға жарамды болып шықты.
Арал теңізінің түбінен су табылды, деп хабарлайды Almaty-akshamy.kz
Сәтбаев университетінің гидролог ғалымдары теңіздің астындағы тұщы суды тауып, дәлелдеп беріп отыр.
«Хабар» арнасының хабарлауынша, ұңғылау жұмыстары 500 метр тереңдікте жүргізілген. Нәтижесінде теңіздің құрғап кеткен бөлігінде жер асты суы табылды.
Бұл жоба әсіресе, Аралдың оңтүстік жағының экологиясын қалпына келтіруге тиімді. Атап айтқанда, сексеуіл алқабын көбейтіп, көгалдандыруға септігін тигізеді. Сондай-ақ ол жерден аң-жануардың бәрі су іше алады. Құмның арасында пайда болатын оазис аймақтың климатына оң әсер етпек. Сөйтіп экожүйені реттейді.
Ғалымдардың айтуынша, бұл ауыл шаруашылық мақсатында экожүйені қалпына келтіруге арналған алғашқы жоба. Іске асып жатса, оң өзгеріс әкеледі. Туризмнің дамуына үлес қосады.
"500 метр тереңдікте бұрғыланған ұңғымадан секундына 8 литрден жер асты суы шығады. Судың тұздылығы бір литрге 3,5 грамм мөлшерінде. Нәтижесінде соларды қолдану арқылы Аралдың құмдарында өсімдіктер өсіруге болады", - дейді гидрогеолог ғалым Дулат Қалитов.