2025 жылға дейін Аралдың 1,1 млн гектар аумағына сексеуіл көшетін отырғызу жоспарланған.
Экологиялық ахуалды жақсарту үшін Арал теңізінің құрғап қалған табанында фитоорманмелиоративтік жұмыс жүргізіліп жатыр, деп хабарлайды Almaty-akshamy.kz.
Бұл жайында Премьер-Министрдің бірінші орынбасары Роман Склярдың Сенат депутаттарының сауалына берген жауабында айтты. Биыл 188,8 мың гектар алқапқа 409,4 млн түп ағаш отырғызу жоспарланған.
«Қазіргі уақытта мемлекеттік орман қорының жалпы аумағы - 30,5 млн гектар, оның ішінде орман жапқан аумақ - 13,6 млн гектар. Мемлекет басшысының орман қоры жерлерінде 2 млрд түп ағаш отырғызу тапсырмасын орындау мақсатында әр өңірде орманды молықтыру және ағаш өсіру кешенді жоспары әзірленіп, бекітілді. Айталық, 2021 жылы - 130 млн түп, 2022 жылы - 282 млн түп ағаш отырғызылып, жылдық жоспар 100 пайыз орындалды. Биыл 188,8 мың гектар алқапқа 409,4 млн түп ағаш отырғызу жоспарланған», - деп атап өтті Үкімет басшысының бірінші орынбасары өз жауабында.
Оның айтуынша, орман қорын толықтыру жөніндегі іс-шараларды жоспарлы жүзеге асыру 2029 жылға қарай орман жапқан жер аумағын 14,5 млн гектарға дейін жеткізуге мүмкіндік береді.