Аталмыш шара онлайн режимде өтті.
22 ақпанда "Аралды құтқару" халықаралық қорының отырысы онлайн режимде өтті. Қазақстан тарапынан бұл шараға Премьер-Министрдің бірінші орынбасары Роман Скляр қатысты, деп хабарлайды Almaty-akshamy.kz Primeminister.kz-ке сілтеме жасап.
Кездесуде су ресурстарын басқару және пайдалану мәселелерін шешудің маңыздылығын түсіну, мүдделі елдер арасындағы көп қырлы ынтымақтастықтың оң үрдістері атап өтілді.
Роман Скляр өз сөзінде Қазақстан тарапы Арал теңізіне трансшекаралық өзендердің ағынының қалыптасу аймағынан жоспарланған экспедицияны қолдайтынын, сондай-ақ осы экспедицияны сәтті ұйымдастыру мен өткізуге көмек көрсетуге дайын екенін атап өтті. Сонымен қатар ирригация мен энергетика мүдделерін ескере отырып, өңірдің су-энергетикалық ресурстарын тиімді пайдалану механизмін қарастыратын Өңірлік су-энергетикалық консорциумын құру мәселесін қарастыру ұсынылады.
Арал теңізі бассейнінің су шаруашылығын, экологиялық және әлеуметтік-экономикалық жағдайын жақсарту қажеттілігі тұрғысында қатысушылар аймақтық ұйымдардың рөлін күшейтудің және аймақтағы барлық елдердің қажеттіліктері мен мүдделерін ескере отырып, су-энергетикалық ресурстарды пайдалану саласындағы тиімді шараларды әзірлеуді жалғастырудың маңыздылығын атап өтті.
Аралды құтқару халықаралық қорының басқарма отырысының нәтижесінде тиісті хаттамалар мен құжаттарға қол қойылды.
Кездесуге сондай-ақ Тәжікстан Республикасы мен Өзбекстан Республикасы Премьер-Министрлерінің орынбасарлары, Түрікменстанның Су ресурстары комитетінің төрағасы, "Аралды құтқару" халықаралық қорына мүше елдердің мүдделі ведомстволарының жауапты қызметкерлері қатысты.