Қазіргі уақытта Қызылорда облысы аумағынан 900 текше метрдей су өте бастаған. Арал маңындағы Қамбаш және Ақшатау көлдер жүйесі қайта қалпына келді.
Өткен жылы бұл жерлерді қуаңшылық жайлаған. Енді Ақлақ су тоспасы арқылы реттелетін тоғыз көл жүйесін суландыру көзделген. Ол үшін тиісті шаралар қолға алынды. Бүгінде Сырдария өзеніне де мол су түсе бастаған, деп хабарлайды Almaty-akshamy.kz
«САРАТС-1» жобасы іске асқаннан кейін теңіз деңгейін 42 метрге дейін көтеруге мүмкіндік туды. Алайда өткен жылы Сырдария өзені арқылы Көк Аралға тиісті көлемдегі су түскен жоқ. Соған байланысты қазір теңіз деңгейі 80 см төмен. Дегенмен өзен бастауындағы қар мен мұз күрт еріп, жауан-шашынның көбеюіне байланысты соңғы күндері Қызылорда облысы аумағына мол су келе бастаған.
«15 сәуірге дейін осы су облыс көлемінен ағып өтіп, солтүстік Арал теңізіне барады деп отырмыз. Оның өзі осындай жауын-шашынның, өзендегі судың есебінен болып отыр. Егін басталғанға дейін солтүстік Арал теңізіне белгілі бір мөлшерде су көлемі беріледі», - дейді Арал-Сырдария бассейндік инспекциясының басшысы Сейілбек Нұрымбетов.
Өткен жылы Арал ауданындағы Бұрмақұлақ бөгетін бекіткеннен кейін, Қамбаш және Ақшатау көлдер жүйесі бұрынғы қалпына келді. Бірер күн бұрын Ақалақ су тоспасы да жабылды. Осылайша, Қаратерең елді мекені маңындағы көлдерді суландыру жоспарланған.
«Бүгінгі күнге судың деңгейі 51,45-ке жетіп отыр. Біздің жоспар сол деңгейді 53-ке жеткізу. Қазір су торабының алдына су жинақталып жатыр. Бізде сегіз канал бар, солар арқылы ірілі-ұсақты тоғыз көлге су беріледі», - дейді «Қазсушар» РМК Қызылорда филиалының бөлім басшысы Айдос Асанбаев.
Мамандардың айтуынша, егін науқаны басталғанға дейін өңірдегі су арналарын толып, шабындықтарды нәрлендіруге үлкен септігін тигізеді.