Түркі мәдениеті және мұрасы қорының Президенті Ақтоты Райымқұлова Польшаға сапары аясында Польша Республикасының Сенаты вице-маршалы Михал Каминскиймен кездесті, деп хабарлайды aqshamnews.kz
«Әдебиет және көркемөнер» порталының хабарлауынша, қор делегациясының Польшаға сапары барысында екіжақты ынтымақтастықты нығайтуға бағытталған бірқатар кездесулер өтті. Атап айтқанда, түркі әлемі мен Польша арасындағы мәдени байланыстарды дамыту, бірлескен жобаларды жүзеге асыру және мәдени мұраны сақтау мәселелері талқыланды.
Кездесу барысында Ақтоты Райымқұлова Түркі мәдениеті және мұрасы қорының түркі халықтарының мәдени және тарихи мұрасын сақтау мен насихаттау бағытында атқарған жұмыстары туралы баяндады. Сондай-ақ, Польшадағы түркі тектес қауымдастықтар – татарлар мен қарайымдардың мәдени мұрасын зерттеу мен сақтау саласында бірлескен бастамаларды қолға алудың маңыздылығын атап өтті.
Өз кезегінде, Польша Сенатының вице-маршалы Михал Каминский тарихи және мәдени мұраны сақтауға Польша үлкен мән беретінін жеткізіп, түркі әлемімен мәдени байланыстарды дамытуға мүдделі екенін білдірді.
Кездесуге Әзербайжан Республикасының Польшадағы Елшісі Нәргіз Құрбанова мен Қазақстан Республикасының Польшадағы Елшісі Әлім Кірабаев қатысып, тараптарды қызықтырған өзге де мәселелер бойынша пікір алмасты.