Ақтөбеде жаяу жүргіншілер өткелінен өтіп бара жатқан алты жасар қыз баланы көлік қағып кетті. Қазіргі уақытта полицейлер жол-көлік оқиғасы бойынша тексеріс жүргізіп жатыр, деп хабарлайды Аqshamnews.kz тілшісі.
Облыстық полиция департаментінің баспасөз қызметі хабарлағандай, оқиға Мира даңғылында болған. Hyundai маркалы автокөліктің жүргізушісі жаяу жүргіншілер жолағынан өтіп бара жатқан 6 жастағы қызды қағып кеткен.
Оқиға сәті әлеуметтік желілерде тараған видеода да көрініс тапты.
«Жол-көлік оқиғасы салдарынан бала түрлі дене жарақаттарын алды. Ол медициналық мекемеге жеткізіліп, қажетті көмек көрсетілді», – деп мәлімдеді облыстық ПД баспасөз қызметі. Қазіргі кезде полиция қызметкерлері жол апатының себептері мен мән-жайын анықтап жатыр.
Облыстық денсаулық сақтау басқармасының мәліметінше, қыз бала көпсалалы облыстық балалар ауруханасының қабылдау бөлімінде тексеруден өткен. Дәрігерлер оның аяқ-қолында сіңір созылуы мен сызаттар барын анықтап, амбулаториялық ем тағайындаған.