Ақтау тұрғындары 15-шағынаудандағы жағалауда орналасқан қоғамдық әжетханаға байланысты шағым түсірді. Олар ішінде балалар ұйықтап жатқанын, ал кассир әйел мас күйінде отырғанын айтты, - деп хабарлайды Aqshamnews.kz тілшісі Lada.kz-ке сілтеме жасап.
Тұрғындардың айтуынша, олар серуендеп жүріп, қоғамдық әжетханаға кірген.
"Кассир әйел мас болғаны анық, бізден төлем алды. Ішке кірсек, еденде балалар жатыр. Артынша ішке тағы бір ер адам мен баласы, сондай-ақ мас әйел кірді. Олар бізбен жанжалдасып, оқиғаны телефонға түсіруге тыйым салуға тырысты. Отбасылар демалуға келетін қоғамдық орын үшін масқара ғой", – деді Ақтау тұрғыны.
Оның сөзінше, әжетханада тағы бір бөлек бөлме болған, онда да балалар ұйықтап жатқан.
Тұрғындар қала әкімдігінен бұл жағдайға назар аударуды және мәселені шешуді сұрады.
Бұл жағдайға байланысты Lada.kz редакциясы Ақтау қаласы әкімдігіне ресми сауал жолдады.