Баку – Грозный бағытындағы рейстің апатынан қаза тапқан AZAL авиакомпаниясы Embraer ұшағы экипажы мүшелерінің туыстары Ақтауға келді, - деп хабарлайды aqshamnews.kz тілшісі Media.az-қа сілтеме жасап.
Ақтауға келгендердің арасында Әзербайжанның ұлттық қаһармандары Хокумә Алиева, Игорь Кшнякин және Александр Кальяниновтың жақындары, сондай-ақ, апатта көз жұмған бірнеше жолаушының отбасы мүшелері болған.
Мәліметке сәйкес, сапарды Қазақстандағы Әзербайжан консулдығы мен AZAL авиакомпаниясы ұйымдастырған.
"Кінәлілер лайық жазасын алған кезде ғана қайғымыз жеңілдейді. Қазақстанда тұратын отандастарымызға көрсеткен қолдауы үшін алғыс айтамын", - деді Хокумә Алиеваның бауыры Джошгун Насибли.
Ақтаудағы ұшақ апаты туралы не белгілі?
Еске салайық, 2024 жылы 25 желтоқсанда Ақтау маңында Бакуден Грозныйға ұшып бара жатқан ұшақ апатқа ұшырады. Бұл - Azerbaijan Airlines әуе компаниясына тиесілі Embraer 190 ұшағы. Ұшақ бортында 67 адам, оның ішінде 5 экипаж мүшесі болған.