Ақтау маңында AZAL әуе компаниясының жолаушылар ұшағы апатқа ұшырағанына бір жыл толған соң, сол қайғылы оқиғадан аман қалған бортсерік Айдан Рагимли қайтадан қызметіне кірісті, деп хабарлайды Aqshamnews.kz тілшісі.
Қазіргі таңда ол өз кәсіби міндетін бұрынғыдай жоғары жауапкершілікпен атқарып жүр. Бұл туралы әуе компаниясының әлеуметтік желідегі ресми парақшасында жарияланған бейнероликте айтылған.
Видеода Айдан Рагимлидің өміріндегі ең ауыр кезеңдердің бірі – J2-8243 Баку–Грозный рейсі екені атап өтіледі.
«Кейбір сезімдерді сөзбен жеткізу мүмкін емес. Алайда өмір жалғаса береді. Айдан сол ауыр сәттерді жүрегінде сақтай отырып, бүгін қайтадан өз ісіне оралып, жолаушылар қауіпсіздігіне жауапты қызметін жалғастырып келеді», – делінген ролик сипаттамасында.
Айта кетейік, әуе апаты 2024 жылғы 25 желтоқсанда Ақтау қаласының маңында болған. Баку–Грозный бағытымен ұшқан AZAL әуе компаниясының ұшағында 67 адам, соның ішінде экипаждың бес мүшесі болған. Апат салдарынан 38 адам қаза тауып, 29 жолаушы аман қалған еді.