Әзербайжанның Загатала қаласының тұрғыны Нурулла Сираджов Ақтау маңында апатқа ұшыраған "Әзербайжан әуе желілері" (AZAL) ұшағының жолаушысы ретінде зардап шеккен еді. Ол 18 қазанда таңертең өз үйінде қайтыс болды, - деп хабарлайды aqshamnews.kz Lent.az-ға сілтеме жасап.
Оқиға күні Нурулла Сираджов жұбайымен бірге Грозныйға бара жатқан. Басылымның айтуынша, олар ұлдарын көруге ұшқан, сонымен қатар, ер адам қатерлі ісікке қатысты ота жасатпақ болған. Алайда апатқа байланысты операция кейінге қалған. Ерлі-зайыпты ауыр жарақат алып, Бакудегі ауруханаға жеткізілген. Жарақаттан айыққанына қарамастан, Сираджов ауруды жеңе алмады.
Еске салайық, AZAL ұшағы 2024 жылғы 25 желтоқсанда Бакуден Грозныйға ұшып бара жатып, Ақтау маңында құлады. Бортта 62 жолаушы және 5 экипаж мүшесі болған, олардың 29-ы аман қалды. Кейін Әзербайжан тарапы оқиғаға ресейлік әскерилерді айыптап, олардың қатысы барын растайтын дәлелдер ұсынған. 2025 жылғы қазанда Владимир Путин Ильхам Әлиевпен кездесуде Ресейдің кінәсін мойындап, AZAL ұшағының апатын, соның ішінде ресейлік әуе кеңістігінде украин дрондарының болуымен байланыстырды. Сондай-ақ, ол атып түсірілген ұшақ үшін Әзербайжанға өтемақы төлеуге уәде берді.