АҚШ-та қауіпті вирустарды тасымалдауы мүмкін маймылдар жүк көлігі аударылғаннан кейін қашып кетті, деп хабарлайды Aqshamnews.kz тілшісі Independent басылымына сілтеме жасап.
Оқиға Миссисипи штатында болған. Жүк көлігінде гепатит С, герпес және COVID-19 вирусын тасымалдау қаупі бар зертханалық маймылдар болған. I-59 федералды тас жолында, Гейдельберг қаласының солтүстігінде көлік аударылып, бірнеше маймыл қашып кеткені анықталды.
Билік өкілдерінің мәліметінше, бір маймыл әлі іздестіріліп жатыр. Жануарлар арнайы торда болған және олар Флорида штатына зерттеу орталығына жеткізілу керек болған.
The Guardian дерегіне сүйенсек, салмағы шамамен 12 келілік бұл маймылдар агрессиялық мінез көрсеткен. Қауіпсіздік мақсатында оларға жақындауға тек жеке қорғаныс құралдарын пайдаланған жағдайда ғана рұқсат берілген.