АҚШ-та алғаш рет H5N5 штаммындағы құс тұмауынан адамның қайтыс болғаны тіркелді, деп хабарлайды Aqshamnews.kz тілшісі. Бұл жағдай Вашингтон штатында расталды.
Денсаулық сақтау департаментінің мәліметінше, көз жұмған адам жасы үлкен және ауыр созылмалы дерттері болған. Бұған дейін H5N5 штаммы адамдар арасында кездеспеген.
Науқастың үй ауласында әртүрлі түрдегі үй құстары ұсталғаны анықталды. Қауіпсіздік мақсатында отбасы мүшелерінің деректері жарияланбай отыр.
Денсаулық сақтау органдары халыққа қауіп деңгейі төмен екенін атап өтті. Пациентпен байланыста болған адамдардың ешқайсысынан вирус анықталмаған, адамнан адамға жұғу фактілері де тіркелмеген.
Соңғы жылдары құс тұмауы сүткоректілер арасында да жиі тарала бастаған. 2024 жылы АҚШ-тың ауыл шаруашылығы министрлігі құс тұмауының кейбір жануарларда да анықталғанын хабарлаған еді.
CDC дерегінше, АҚШ-та жалпы 70-тен астам адамда жұқтыру жағдайы расталған (Вашингтондағы соңғы жағдайды есептемегенде). Көпшілігі ауру малмен, құс фабрикаларында немесе жұқтырылған жануарлармен жұмыс кезінде инфекция жұқтырған.
ABC News хабарлауынша, көбіне ауру жеңіл симптомдармен: көздің қызаруы, дене қызуының көтерілуімен өткен. Алайда кейбір науқастарда ауыр белгілер байқалған. Бұған дейін қаңтар айында АҚШ-та құс тұмауынан алғашқы адам өлімі тіркелген болатын — ол да жасы үлкен, денсаулығында күрделі мәселелері бар пациент еді.