2025 жылдың 10 қаңтарында АҚШ Қаржы министрлігі Ресейге қарсы ең қатаң санкциялар пакетін жариялады. Бұл шектеулер Ресейдің мұнай кірістеріне бағытталып, елдің мұнай-газ секторындағы негізгі ойыншыларды, сондай-ақ ресейлік мұнайды тасымалдайтын 180-нен астам кемені қамтиды, деп хабарлайды aqshamnews.kz.
Санкциялық тізімге «Газпромнефть», «Сургутнефтегаз» және олардың еншілес компаниялары, соның ішінде мұнай өңдеу зауыттары мен мұнай өндіруші кәсіпорындар кірді. Олардың қатарында Мәскеу және Омбы МӨЗ-дері, «Газпромнефть-Ноябрьскнефтегаз», «Газпромнефть-Оренбург» және басқалары бар. Шектеулер «Газпром нефтьтің» Қазақстан, Тәжікстан, Қырғызстан, Сербия (NIS) және Люксембургте тіркелген Gazprom Neft International шетелдік құрылымдарын да қамтыды.
Санкцияға «Роснефтефлот» компаниясына тиесілі, ұзындығы 250 метр, жүк көтерімділігі 114 мың тонна болатын «афрамакс» класты мұнай танкері де ілікті. Бұл кеме шикі мұнай және сұйық жүктерді тасымалдауға арналған.
Бұл танкер 2020 жылдың 6 шілдесінде Ресейдің «Звезда» кеме жасау кешенінде Қазақстанның тұңғыш президентінің 80 жылдығына орай салынған. Назарбаевтың есімі танкерге Ресей үкіметінің Қазақстан мен Ресей арасындағы қарым-қатынасты дамытуға қосқан үлесін мойындауы ретінде берілген.