Ақмола облысының Сандықтау ауданында көрші зейнеткерлердің атына заңсыз несие рәсімдеген әйел 2 жыл 4 айға сотталды, деп хабарлайды Aqshamnews.kz тілшісі.
Құқық қорғау органдары оның әрекетін алаяқтық ретінде бағалады. Тергеу барысында әйелдің қарт адамдардың сеніміне кіріп, түрлі құжаттар мен жәрдемақыларды рәсімдеуге көмектескені анықталды. Осылайша ол зейнеткерлердің жеке деректерін жинап алып, олардың хабарынсыз несие рәсімдеп отырған.
«Істі қарау нәтижесінде айыпталушы Қылмыстық кодекстің “Алаяқтық” бабы бойынша кінәлі деп танылып, 2 жыл 4 ай мерзімге бас бостандығынан айырылды», – деп хабарлады Ақмола облысының прокуратурасы.
Белгілі болғандай, әйел зейнеткерлерді алдау арқылы жалпы сомасы 7 млн теңге көлемінде несие алған.