Биылғы Apple Fest алматылықтар мен қала қонақтарының есінде тек ауқымды мәдени бағдарламасымен ғана емес, сонымен қатар ерекше жетістіктерімен қалды. Фестиваль тарихында алғаш рет 1 700 литр алма компоты қайнатылып, бұл Гиннестің рекордтар кітабына енді. Компотты сатудан түскен қаражат қала саябақтары үшін құс үйлерін, қоректендіргіштер мен ағаш және бұта көшеттерін сатып алуға бағытталады.
Apple Fest аясында алматылық 50 бағбан 130 тоннадан астам алма, соның ішінде әйгілі «апорт» сортын ұсынды. Парк аумағында цирк шапито жұмыс істеп тұр, оның астында «Курьез» клоундар квартеті, тросттардағы эквилибр, Эфиопиядан келген Black Eagles командасы икарий ойындарымен, роликтегі акробаттар, арқанмен жүрушілер және үйретілген жылқылар мен иттер өнер көрсетеді. Айта кету керек, цирк 25 қыркүйекке дейін жұмысын жалғастырады. Цирк қойылымдарынан басқа, барлық концерттер мен аттракциондарға тегін кіруге болады.
Фестивальдің басты сахнасында Republic би ұжымы, әнші Толқын Забирова, Sopranova және Umberto project топтары өнер көрсетті. Сонымен қатар, Қазақстанның халық әртісі Роза Рымбаева, еңбек сіңірген әртіс Бақтияр Тайлақбаев және Алматы қаласының эстрадалық-симфониялық оркестрі концертті жалғастырды. Одан кейін этнотоп Steppe Sons, Umberto project, «Асу» тобы, Димаш Дәулетов, Kyle Ruh, Дәурен Байбори, Ерназар Жұбан, Бауыржан Мусин, Диана Исмаилова және басқа да әртістер көрермендерді қуантты.
Фестиваль кезінде саябақ аумағы тақырыптық аймақтарға бөлінді. Мысалы, «Бақша инновациялары» аймағында қонақтарға Алматының көгалдандыру барысында инновациялық тәсілдер қалай қолданылатыны көрсетілді. «Гүл ғажайыптары бульвары» үлкен баққа айналды.
Сонымен қатар, алма, қолөнер, крафт өнімдері жәрмеңкесі, Елшілік аллеясы, бақша құрал-жабдықтары жәрмеңкесі сияқты іс-шаралар ұйымдастырылды. Күні бойы ашық аспан астындағы кинотеатрда қазақ киносының «Алтын қорынан» фильмдер көрсетілді.
