Айыппұл төлейсің!
Әнұранға лайықты құрмет көрсетпеген атыраулық әскери қызметшіге 172 500 теңге айыппұл салынды, деп хабарлайды Almaty-akshamy.kz
AtyrauPress порталының мәліметі бойынша, Мақат ауданында өткен спорттық шара кезінде Әнұран орындалғанда әскери қызметшілердің біреуі оң қолының екі саусағын ғана кеуде тұсына қойып тұрғаны видеоға жазылып қалған. Осыдан кейін мемлекеттік рәміздерді насихаттау ұлттық орталығы облыстық ішкі саясат пен аудан әкімініне шағым түсіріп, Әнұранға лайықты құрмет көрсетпеген әскери қызметшіні жауапқа тартуды талап еткен.
Жергілікті полиция басқармасының бастығы Ерлан Биғамбаевтың айтуынша, арыз "Е-Өтініш" порталы арқылы тіркелген. Одан кейін полиция бөлімінің қарауына түсті.
"Кінәлі адам анықталды, оған заң бойынша әкімшілік айыппұл салынды", - дейді Биғамбаев.
Әкімшілік құқық бұзушылық кодексінің 458-бабы, 1-тармағы (Қазақстан Республикасының Мемлекеттік Гимнін Қазақстан Республикасы заңнамасының талаптарын бұза отырып пайдалану және орындау) бойынша хаттама рәсімделді. Оған сәйкес, әскери қызметшіге 50 АЕК (172 500 теңге) көлемінде айыппұл салынды. Бір аптаның ішінде айыппұлдың жартысын ғана төлеуге болады.